അതിജീവനത്തിന്റെ ഇതിഹാസമാണ് നടി മമ്ത മോഹന്ദാസിന്റെ ജീവിതം. വെള്ളിത്തിരയുടെ തിളക്കത്തില് നില്ക്കുന്നതിനിടെ പൊടുന്നനെ എത്തിയ കാന്സര് രോഗമാണ് ജീവിതത്തില്നിന്ന് മമ്തയെ പിടിച്ചു വലിക്കുന്നത്. എന്നാല്, കൃത്യസമയത്തു തിരിച്ചറിഞ്ഞും ശരിയായ ചികില്സ നല്കിയും രോഗത്തെ മറി കടന്ന് സിനിമയുടെ ലോകത്ത് വീണ്ടും സജീവമാകുകയാണ് ഈ താരം.
സജീവമായി നില്ക്കുന്നതിനിടെ ഈയിടെ രണ്ടാമതും മമ്തയ്ക്ക് കാന്സര് ബാധ കണ്ടെത്തി. എന്നാല്, തളരാതെ വീണ്ടും ചികില്സ ആരംഭിച്ച താരം രോഗത്തെ തോല്പ്പിച്ച ശേഷം ഇതാ വീണ്ടും തിരിച്ചു വരികയാണ്. 'നൂറ വിത് ലവ്' എന്ന സിനിമയിലൂടെ ചലച്ചിത്ര രംഗത്തേക്ക് വീണ്ടും സജീവമാകുകയാണ് മമ്ത ഇപ്പോള്.
ഇതോടൊപ്പം കാണുന്ന ചിത്രം മമ്തയുടേതാണ്. ഇന്നലെ, ലോക കാന്സര് ദിനത്തില് ട്വിറ്ററിലൂടെയാണ് മമ്ത ഈ ചിത്രം പുറത്തു വിട്ടത്. അവസാന കീമോ തെറാപ്പിയും കഴിഞ്ഞ് ജീവിതത്തിലേക്ക് തിരിച്ചു വരുന്ന നേരത്തിന്റെ ചിത്രമാണിത്. ആത്മവിശ്വാസവും ധീരതയും കൊണ്ട് രോഗത്തെ കീഴടക്കിയ നടിയുടെ ഇച്ഛാശക്തി ആ കണ്ണുകളില് തെളിഞ്ഞു കാണാം.